ប្រែសម្រួល៖សហការី
ទីភ្នាក់ងារថាមពលបរមាណូអន្តរជាតិ (IAEA) បានប្រកាសនៅលើបណ្តាញសង្គម X ថា ការផ្ទុះដ្រូនមួយនៅឯចំណតរថយន្តក្រុងដែលបុគ្គលិកនៃរោងចក្រថាមពលនុយក្លេអ៊ែរ Zaporizhzhiaហៅកាត់ថា (ZNPP) ប្រើប្រាស់ បានបណ្តាលឱ្យមនុស្សម្នាក់ស្លាប់ និង ១៥ នាក់ផ្សេងទៀតរងរបួស នៅវេលាម៉ោងប្រហែល ៦ ព្រឹក (ម៉ោងក្នុងតំបន់) ថ្ងៃទី ១៨ ខែសីហា។

រដ្ឋបាលដែលត្រូវបានតែងតាំងដោយរុស្ស៊ីនៅរោងចក្រនេះ — ដែលស្ថិតក្រោមការកាន់កាប់របស់រុស្ស៊ីតាំងពីខែមីនា ឆ្នាំ ២០២២ — បានប្រាប់ IAEA ថា បុគ្គលិក និងអ្នកម៉ៅការបន្តចំនួន ១៦ នាក់បានរងរបួសនៅក្នុងការផ្ទុះនេះ។

IAEA ដែលជាស្ថាប័នឃ្លាំមើលនុយក្លេអ៊ែររបស់អង្គការសហប្រជាជាតិ ក៏បានលើកឡើងនៅលើបណ្តាញសង្គម X ដែរថា នាយករោងចក្របានពណ៌នាហេតុការណ៍នេះថាជា «ព្រឹត្តិការណ៍ដ៏អាក្រក់បំផុតដែលរោងចក្រនេះធ្លាប់ជួបប្រទះ»។

អគ្គនាយក IAEA លោក Rafael Grossi ដែលបានទៅទស្សនារោងចក្រ ZNPP ចុងក្រោយកាលពីថ្ងៃទី ៤ ខែកញ្ញា ឆ្នាំ ២០២៤ បានអំពាវនាវដល់ «មេបញ្ជាការយោធាដែលទទួលខុសត្រូវចំពោះសកម្មភាពទាំងនេះ ក៏ដូចជាអ្នកដែលកំណត់គោលដៅលើរោងចក្រថាមពលនុយក្លេអ៊ែរ ឬបុគ្គលិករបស់រោងចក្រ ឱ្យបញ្ឈប់ជាបន្ទាន់នូវសកម្មភាពដែលមិនអាចទទួលយកបានទាំងនេះ»។

IAEA មិនបានបញ្ជាក់ច្បាស់ថា តើការវាយប្រហារនេះត្រូវបានធ្វើឡើងដោយកងកម្លាំងរុស្ស៊ី ឬអ៊ុយក្រែននោះទេ ដែលស្រដៀងនឹងហេតុការណ៍កាលពីថ្ងៃទី ៤ ខែមិថុនា នៅពេលដែលរោងចក្រថាមពលកម្ដៅ Zaporizhzhia (ដែលមានស្ថានីយបំប្លែង និងបញ្ជូនអគ្គិសនីទៅកាន់រោងចក្រ ZNPP) ត្រូវបានវាយប្រហារយ៉ាងខ្លាំងក្លា នេះបើយោងតាមទីភ្នាក់ងារនេះ។

រុស្ស៊ីបានចោទប្រកាន់ថា ដ្រូនរបស់អ៊ុយក្រែនជាអ្នកវាយប្រហារកាលពីថ្ងៃទី ៤ ខែមិថុនា។ កងកម្លាំងការពារភាគខាងត្បូងរបស់អ៊ុយក្រែនបានបដិសេធការអះអាងនេះ ដោយលើកឡើងថាវាជា «ការបំភ្លៃការពិត និងជាការប៉ុនប៉ងជះឥទ្ធិពលលើ IAEA» ហើយថា «ប្រភពតែមួយគត់នៃហានិភ័យចំពោះសុវត្ថិភាពនុយក្លេអ៊ែរ និងវិទ្យុសកម្មនៅរោងចក្រ ZNPP គឺវត្តមានរបស់កងទ័ពរុស្ស៊ី»។

រោងចក្រថាមពលនុយក្លេអ៊ែរ Zaporizhzhia គឺជារោងចក្រថាមពលនុយក្លេអ៊ែរដ៏ធំបំផុតរបស់អឺរ៉ុប និងស្ថិតក្នុងចំណោមរោងចក្រធំជាងគេទាំង ១០ នៅលើពិភពលោក។ អ៊ុយក្រែនបានព្រមានម្តងហើយម្តងទៀតថា ការកាន់កាប់រោងចក្រនេះដោយរុស្ស៊ី បង្កជាការគំរាមកំហែងដ៏ធំបំផុតមួយចំពោះសុវត្ថិភាពនុយក្លេអ៊ែរ មិនត្រឹមតែនៅក្នុងប្រទេសអ៊ុយក្រែនប៉ុណ្ណោះទេ ប៉ុន្តែនៅទូទាំងពិភពលោកផងដែរ។

នៅក្នុងខែឧសភា ទីភ្នាក់ងារ IAEA ក៏បានរាយការណ៍ផងដែរអំពីការកើនឡើងយ៉ាងខ្លាំងនៃសកម្មភាពយន្តហោះគ្មានមនុស្សបើក (drone) នៅក្បែរទីតាំងរោងចក្រថាមពលនុយក្លេអ៊ែរមួយចំនួនរបស់អ៊ុយក្រែន ដោយមានការកត់ត្រាឃើញយន្តហោះប្រភេទនេះជាង ១៦០ គ្រឿងនៅតំបន់ជុំវិញនោះក្នុងអំឡុងថ្ងៃទី ១៣ និងទី ១៤ ខែឧសភា៕
ប្រភព៖ Kyiv independent